HANDELINGE 26:15-16, 18 AFR53

12. En kyk, Ek kom gou, en my loon is by My, om elkeen te vergeld soos sy werk sal wees. 14. Salig is die wat sy gebooie doen, sodat hulle reg kan hê op die boom van die lewe en ingaan deur die poorte in die stad. 15. Maar buite is die honde en die towenaars en die hoereerders en die moordenaars en die afgodedienaars en elkeen wat leuens liefhet en doen. *** Kern gedeelte: "Salig is die wat sy gebooie doen" Soveel mense glo nie meer dat dit nodig is om GOD se gebooie te onderhou nie, want dit is te "wetties" te wet gedrewe. Nee, ek onderhou nie die gebooie sodat ek gered kan word, want ek is reeds gered deur my Verlosser en Saligmaker, JESUS CHRISTUS. Ek onderhou die gebooie uit liefde vir GOD en gehoorsaamheid van Sy Woord. Uit die 33/53 Vertaling van GOD se Woord, lees gerus ook Openbaring 12:17 en Openbaring 14:12 vir meer duidelikheid. Elkeen kan vir hulle self besluit, gaan ons gehoorsaam wees aan GOD se Woord, of gaan ons voortleef in die leringe van die wêreld. Wie ore het, laat hom hoor! ------- GEBED. VADER, ons kies om siende blind, en horende doof deur die lewe te gaan wanneer U Woord ter sprake kom en tog hang ons elke lering van die wêreld, die "verderwer" aan sonder om enige iets te bevraagteken. Laat U Heilige Gees asb die sluier oor ons oë lig sodat ons die waarheid van U Woord sal sien, ervaar en verstaan. In die Naam van ons Meester YESHUA, bid ons vir 'n gees van onderskeiding sodat ons deur die leuens van die "verderwer kan onderskei van U Woord. Amen. ••••••• Webtuiste: https://tentvansamekoms.co.za Sel: +27716283107

6. En Hy het vir my gesê: Dit is verby! Ek is die Alfa en die Oméga, die begin en die einde. Aan die dorstige sal Ek gee uit die fontein van die water van die lewe, verniet. 7. Hy wat oorwin, sal alles beërwe; en Ek sal vir hom 'n God wees, en hy sal vir My 'n seun wees. 8. Maar wat die vreesagtiges aangaan en die ongelowiges en gruwelikes en moordenaars en hoereerders en towenaars en afgodedienaars en al die leuenaars — hulle deel is in die poel wat brand met vuur en swawel: dit is die tweede dood. *** Kern gedeelte: "hulle deel is in die poel wat brand met vuur en swawel" In hierdie lewe kan ons dit probeer ontken, ons kan met ons kop in die sand lewe, voorgee dat ons nie sien nie, maar die realiteit gaan nie verander nie. Die tyd vir elkeen om hierdie aarde te verlaat gaan een of ander tyd aanbreek, en nie een van ons gaan die Wittroon oordeel mis nie. Elkeen sal verantwoording doen vir sy eie dade, en as jy die weë van hierdie wêreld oorwin het, het jy niks om te vrees nie. Ek sê verder niks, almal kan lees, die Woord maak dit duidelik. Elkeen wat hierdie Woord lees weet waarheen hulle oppad is, die oordeel kom my nie toe nie. Maar as jy twyfel, GOD gee uit die fontein, van die water van die lewe, verniet! As jy nog nie JESUS CHRISTUS in jou lewe ontmoet het nie, maak vandag die keuse. ------- GEBED. VADER, dankie vir hierdie nuwe dag, dankie dat U ons nog die geleentheid gegun het om ons lewe vandag aan U oor te gee want U Woord sê, so lief het GOD die wêreld gehad dat Hy Sy Eniggebore Seun gegee het, sodat Elkeen wat in Hom glo, nie verlore mag gaan nie, maar die ewige lewe kan hê. Laat U Heilige Gees ons asb vandag aanraak sodat ons die aanraking van U seun sal ervaar. In die Naam van ons Meester YESHUA, bid ons vir elkeen wat by die kruispad van die lewe staan, en ons vra dat U elkeen sal aanraak, sodat hulle sal kies, om gekies te word. Amen. •••••••  Webtuiste: https://tentvansamekoms.co.za Sel: +27716283107

5. En die engel wat met my gespreek het, antwoord en sê vir my: Weet jy dan nie wat dit beteken nie? En ek het gesê: Nee, my heer. 6. Toe antwoord hy en sê vir my: Dit is die woord van die Here aan Serubbábel, naamlik: Nie deur krag of deur geweld nie, maar deur my Gees, sê die Here van die leërskare. *** Kern gedeelte: "Nie deur krag of deur geweld nie" So dikwels wil ons dinge forseer, ryp druk, en in eie krag wil ons, ons sake hanteer wat nie volgens ons, vinnig genoeg beweeg of gebeur nie. Vanoggend kry ons die boodskap wat sê, wag dit uit, maak spasie sodat GOD hierdie saak kan hanteer. As ons te naby aan hierdie saak bly, gee ons GOD nie kans om te doen wat Hy wil doen nie. Moenie die situasie versleg nie, moenie inmeng nie en moenie sake in eie hande neem nie. Die boodskap is duidelik, Nie deur krag of deur geweld nie, maar deur my Gees. Laat GOD hierdie saak hanteer. ------- GEBED. VADER, soos Hiskia lê ons, ons probleme voor U voete neer. Gee ons asb die krag om te laat gaan, dit te los en daarvan weg te stap in die wete dat deur die inwerking van die Heilige Gees sal sake opgelos word, sal elke negatiewe situasie of probleem soos mis voor die son verdwyn. In die Naam van ons Meester YESHUA, bid ons vir elkeen wat voel dat hulle kan nie meer wag nie en sake in eie hande wil neem. Versterk asb elkeen wat dit nodig het. Amen. •••••••  Webtuiste: https://tentvansamekoms.co.za Sel: +27716283107

7. Laat die goddelose sy weg verlaat en die kwaaddoener sy gedagtes; en laat hy hom tot die Here bekeer, dan sal Hy hom barmhartig wees; en tot onse God, want Hy vergeef menigvuldiglik. 8. Want my gedagtes is nie julle gedagtes nie, en julle weë is nie my weë nie, spreek die Here. 9. Want soos die hemel hoër is as die aarde, so is my weë hoër as julle weë en my gedagtes as julle gedagtes. *** Kern gedeelte: "Want my gedagtes is nie julle gedagtes nie" Gedurig deur wil ons GOD voorskryf, terwyl ons nie eers weet wat die dag van môre sal inhou nie. Ons raak nie stil voor GOD om na Sy Stem te luister nie, en ons gee ook nie ag op die waarskuwings deur die inwerking van GOD se Heilige Gees nie. GOD beplan vir ons 'n hoopvolle toekoms, 'n lewe van oorvloed, maar deur hardnekkigheid, eiesinnigheid en hardkoppigheid jaag ons die verkeerde pad, die weë van hierdie wêreld na. As dinge skeefloop blameer ons GOD omdat hy terugslae in ons lewe toelaat. Wat ons sien as terugslae, is eintlik struikelblokke op pad na die hel, want daarsonder sou ons oop oë hel toe gestap het. Vandag, soos hierdie nuwe dag begin, volg GOD se plan, luister na Sy Stem, want soos die hemel hoër is as die aarde, so is GOD se weë hoër as ons weë en Sy gedagtes as ons gedagtes. ------- GEBED. VADER, soms wil dinge nie uitwerk nie, en ons faal keer op keer. Maar ons raak nie net vir 'n oomblik stil voor U voete om U Wil vir ons lewe te probeer verstaan nie. Ons bid dat U ons teen onself sal bewaar, want ons keuses lei tot verkwiste tyd, frustrasies en depressie. Spreek asb vandag U Wil in ons lewe in en rig ons op die pad wat U vir ons beplan. In die Naam van ons Meester YESHUA, bid ons vir U ingryping in ons lewe waar ons die pad byster raak. Amen. •••••••  Webtuiste: https://tentvansamekoms.co.za Sel: +27716283107

5. So sê die Here van die leërskare dan nou: Gee ag op wat julle wedervaar het: 6. julle het baie gesaai, maar min ingebring; julle het geëet, maar nie tot versadiging nie; julle het gedrink, maar nie genoeg gekry nie; julle het jul geklee, maar nie warm geword nie; en wie hom vir loon verhuur, verhuur hom om dit in 'n stukkende beurs te steek. 7. So sê die Here van die leërskare: Gee ag op wat julle wedervaar het! *** Kern gedeelte: "Gee ag op wat julle wedervaar het" 'n Volk sonder GOD, is 'n versukkelende volk, en 'n huis sonder GOD is 'n gebroke huis. As iemand oor hierdie wil debateer, kyk om jou rond in ons land Suid-Afrika, en sien hoe 'n eens voortvarende land besig is om tot 'n val te kom. Dit het gebeur omdat ons as volk, van GOD af weggedraai het. Dieselfde sal ook in ons huise, ons gesinne gebeur as ons begin om van GOD af weg draai! Ons sal ook deur baie moeite gaan, maar die beloning daarvan sal min wees. Ons sal vrede in huis verwag, maar dit sal met storms gevul wees, ons sal seëninge in ons bank rekenings nie sien nie, want die skuldeisers sal alles verteer. Maar as ons in alles GOD eerste stel, dit wat ons doen, doen ter ere van Sy Naam, as ons binne Sy Wil begin leef, sal die vensters van die Hemel vir ons weer oopgemaak word, met 'n uitstort van seëninge. Daarom, vanoggend ,Gee ag op wat julle wedervaar het! ------- GEBED. VADER, beskaamd staan ons voor U, ons huise gevul met sondes, ons land in verwarring. Laat vandag asb die eerste tree wees op ons pad na herstel, op ons pad terug na U, en leer ons asb om U in waarheid te soek, sonder om ons eie voordeel daarin te soek. Dankie dat U ons vanoggend nog die geleentheid gee om sake reg te maak. In die Naam van ons Meester YESHUA, spreek ons lewe oor ons huise, gesinne, gesondheid en finansies, ter ere van U. Amen. •••••••  Webtuiste: https://tentvansamekoms.co.za Sel:+27716283107